دليل تثبيت مودات Bedrock (MCPE) — من الصفر

للموبايل · Windows 10/11 · Xbox · PlayStation · Switch

الدليل ده بيمشي معاك من أول «إيه هو الـ add-on» لحد ما المود يشتغل في عالمك. لو أول مرة تجرّب، اقرأه بالترتيب. ولو عندك مشكلة معيّنة، انزل لقسم حل المشاكل تحت.

أول حاجة: إنت على Bedrock فعلاً؟

لو بتلعب على موبايل، Xbox، PlayStation، Switch، أو تطبيق Minecraft من متجر ويندوز — إنت على Bedrock. الدليل ده ليك.

لو بتفتح اللعبة من Minecraft Launcher على كمبيوتر — إنت على Java، وملفات المودات مختلفة تماماً. روح دليل Java.

أنواع الملفات

.mcaddon — الأشهر. بيحتوي على Behavior Pack و Resource Pack مع بعض.
.mcpack — حزمة واحدة بس. لو المود جاي في ملفين، ثبّت الاتنين.
.mcworld — عالم جاهز والمود متثبّت فيه. تفتحه وتلعب على طول.
.zip — لو الملف نزل بالامتداد ده، غيّره لـ .mcaddon.

قبل ما تبدأ

Minecraft أصلية. النسخ المعدّلة بتعمل مشاكل كتير مع الـ add-ons.
اتأكد من نسخة اللعبة. شوفها في شاشة البداية تحت الشعار، وقارنها بالمطلوب على صفحة المود.
خد نسخة احتياطية من عوالمك المهمة.
مساحة كافية. بعض المودات حجمها 100 ميجا وأكتر.
حمّل من المصدر الرسمي بس — MCPEDL. راجع دليل التحميل الآمن.

الخطوات — موبايل (Android)

افتح صفحة المود على DeepCraft واضغط رابط المصدر الرسمي.
في صفحة MCPEDL، انزل لآخر الصفحة — زرار التحميل الحقيقي بيكون هناك. الزراير الملوّنة الكبيرة في نص الصفحة غالباً إعلانات.
استنى التحميل يخلّص بالكامل. لو ضغطت على الملف وهو لسه بينزّل، هتظهرلك رسالة «الملف تالف».
افتح مجلد Downloads من مدير الملفات ودوس على ملف .mcaddon.
Minecraft هتفتح لوحدها وتبدأ الاستيراد. استنى رسالة النجاح.
ارجع لشاشة اللعبة: Play ← Create New ← Create New World.
في قسم Behavior Packs اضغط Activate جنب المود.
في قسم Resource Packs اضغط Activate جنب حزمة المود.
انزل لقسم Experiments وفعّل الخيارات كلها (مهم جداً).
اضغط Create وادخل العالم.

الخطوات — iPhone / iPad

حمّل الملف من Safari.
افتح تطبيق Files ← Downloads.
اضغط على الملف ← Share ← اختار Minecraft.
باقي الخطوات زي الأندرويد بالظبط.

الخطوات — Windows Bedrock

حمّل ملف .mcaddon من المصدر الرسمي.
دبل-كليك على الملف — Minecraft Bedrock هتفتح تلقائياً وتستورد.
Create New World ← فعّل الحزم من قسم Add-Ons.
فعّل Experiments.
اضغط Create والعب.

Experimental Features — أهم إعداد

ده سبب أكتر من نص مشاكل «المود مش شغال». معظم الـ add-ons الحديثة بتستخدم ميزات تجريبية، ولو الخيار مقفول المود مش هيشتغل حتى لو ظاهر إنه مفعّل.

إزاي تفعّله: من شاشة إنشاء العالم، انزل لقسم Experiments وفعّل Holiday Creator Features وBeta APIs وأي خيارات تانية موجودة.

ملاحظة: تفعيل الميزات التجريبية بيقفل الإنجازات (Achievements) في العالم ده. ده طبيعي ومفيش حل ليه.

نصيحة حودا: مودات الأنمي (ناروتو، دراغون بول، Demon Slayer، جوجوتسو) محتاجة جهاز 4 جيجا رام على الأقل. لو جهازك أقل، شوف قسم البدائل الخفيفة في مراجعاتنا — كل مراجعة فيها المتطلبات الحقيقية.

حل المشاكل الشائعة

«الملف تالف» أو Import Failed

التحميل ما خلصش — حمّل تاني واستنى.
الملف نزل .zip — غيّر الامتداد لـ .mcaddon.
المود مبني لنسخة Minecraft أحدث من اللي عندك.

المود مفعّل بس مش شغال

Experimental Features مقفولة. دي المشكلة في 90% من الحالات.

الكائنات ظاهرة بيضة أو من غير شكل

الـ Resource Pack مش مفعّل. راجع تبويب Resource Packs.

المهارات مش شغالة بس الأشكال ظاهرة

العكس — الـ Behavior Pack مش مفعّل.

اللعبة بتقفل عند الدخول

مشكلة رام — قلّل Render Distance لـ 6 واقفل التطبيقات التانية.
تعارض بين مودين — شغّل مود واحد بس.

lag شديد

راجع 12 خطوة لحل الـ Lag — فيها إعدادات بتفرق فعلاً.

قواعد ذهبية

مود أنمي واحد بس في المرة. كلهم بيعدّلوا نظام القتال والتعارض مضمون.
عالم جديد لكل مود. بيمنع مشاكل كتير.
متحدّثش Minecraft قبل ما تتأكد إن مودك اتحدّث.
اقرا متطلبات المود قبل ما تحمّل — بتوفّر وقت وإحباط.

الخطوة الجاية

المود شغال؟ ممتاز. دلوقتي شوف المراجعات عشان تختار اللي بعده، أو جرّب تحدي 100 يوم.

لسه فيه مشكلة؟ 5 أخطاء شائعة أو كلّمنا.